This guide is written in Kuwaiti Arabic. Switch to Arabic for the best reading experience.
أغلب الناس تكتب للذكاء الاصطناعي سطر واحد وتنتظر نتيجة احترافية. المشكلة مو بالأداة، المشكلة إنها ما تعرف عنك ولا عن شغلك شي.
في هالدليل بنتعلم قالب بسيط من 5 خانات، تعبّيها مرة وحدة وتلاحظ الفرق من أول رد. ينفع مع ChatGPT و Claude و Gemini وأي أداة ثانية.
1ليش الجواب يطلع عام؟
لما تكتب «اكتب لي إعلان لمطعمي»، الأداة لازم تخمّن كل شي: شنو المطعم؟ مين الجمهور؟ وين بينزل الإعلان؟ كم طوله؟
كل تخمين = نتيجة عامة تقدر تنطبق على أي مطعم بالعالم. الحل إنك تقلل التخمين، وهذا بالضبط اللي تسويه الخانات الخمس.
2الخانات الخمس
- الدور: منو تبي الأداة تكون؟ «أنت مسوّق محتوى للمطاعم في الكويت».
- المهمة: شنو تبي بالضبط؟ فعل واضح: اكتب، لخّص، رتّب، قارن.
- السياق: المعلومات اللي ما تعرفها الأداة: مشروعك، جمهورك، هدفك، أي أرقام.
- شكل النتيجة: جدول؟ نقاط؟ 3 خيارات؟ كم كلمة؟ بأي لهجة؟
- القيود: شنو ما تبيه: «بدون مبالغة»، «لا تخترع أرقام»، «بدون إيموجي».
3مثال: قبل وبعد
قبل
اكتب لي إعلان لمطعميبعد
أنت مسوّق محتوى للمطاعم في الكويت.
اكتب 3 كابشنات إنستغرام لمطعم «سفرة البيت» (أكل كويتي بيتي) بمنطقة حولي.
الجمهور: موظفين بين 25 و40 يدورون غدا سريع أيام الدوام.
الهدف: نزيد طلبات الغدا من الساعة 12 إلى 2.
كل كابشن أقل من 25 كلمة، بلهجة كويتية خفيفة، ويختم بدعوة للطلب.
بدون كلمات مستهلكة مثل «الأفضل» و«لا يفوتك»، وبدون أسعار.لاحظ إن الطلب الثاني ما فيه أي كلمة «سحرية». كله معلومات كانت في راسك، بس الحين صارت عند الأداة.
4القالب جاهز للنسخ
انسخه، عبّي اللي بين القوسين، واحذف أي خانة ما تحتاجها:
الدور: أنت [المهنة/الخبرة].
المهمة: [الفعل + الشي المطلوب بالضبط].
السياق: [عن المشروع، الجمهور، الهدف، أي معلومة مهمة].
شكل النتيجة: [جدول / نقاط / فقرة] — [الطول] — [اللغة واللهجة].
القيود: [شنو ما تبيه]. إذا ناقصك معلومة اسألني قبل لا تبدأ.الجملة الأخيرة «إذا ناقصك معلومة اسألني» وايد مهمة: بدال لا تخمّن الأداة، بتسألك هي.
5بعد أول رد: لا تعيد الكتابة، عدّل
إذا النتيجة قريبة بس مو مضبوطة، لا تبدأ من الصفر. كمّل بنفس المحادثة بجمل قصيرة مثل:
- «الثاني زين، سوّ منه 3 نسخ بنبرة أخف»
- «قصّره للنص»
- «نفس الفكرة بس للطلاب بدل الموظفين»
وإذا تبي برومبتات جاهزة لمواضيع كثيرة، تلقاها في مكتبة البرومبتات.
أسئلة شائعة
هل القالب يشتغل بالإنجليزي بعد؟
إي، نفس الخانات. وتقدر تكتب الطلب بالعربي وتطلب النتيجة بالإنجليزي أو العكس.
ليش أحط قيود؟ مو أحسن أخليه حر؟
القيود توفّر عليك التعديل. الأداة تميل للأسلوب العام والمبالغة، فلما تقول لها شنو ما تبيه، تطلع النتيجة أقرب لأسلوبك.
تبي أحد يطبّق هذا معاك أو مع فريقك؟ راسلني ونرتّب جلسة أو ورشة.
اسألني على واتساب